ਚੰਡੀਗੜ੍ਹ-ਮੁਹਾਲੀ ਖੇਤਰ ਵਿੱਚ ਅੱਜ ਹੋਈ ਭਰਵੀਂ ਬਾਰਸ਼ ਮਗਰੋਂ ਚੰਡੀਗੜ੍ਹ ਤੋਂ ਆਉਂਦੀ ਚੋਈ ਵਿੱਚ ਪਾਣੀ ਆਉਣ ਨਾਲ ਕਿਸਾਨਾਂ ਨੇ ਸੁੱਖ ਦਾ ਸਾਹ ਲਿਆ। ਇਸ ਚੋਈ ਦੇ ਪਾਣੀ ਉੱਤੇ ਬਨੂੜ ਖੇਤਰ ਦੇ ਦਰਜਨ ਤੋਂ ਵੱਧ ਪਿੰਡਾਂ ਦੀਆਂ ਫ਼ਸਲਾਂ ਨਿਰਭਰ ਕਰਦੀਆਂ ਹਨ। ਪਿਛਲੇ ਇੱਕ ਹਫ਼ਤੇ ਤੋਂ ਚੋਈ ਵਿੱਚ ਪਾਣੀ ਨਾ ਆਉਣ ਕਾਰਨ ਚੋਈ ਸੁੱਕੀ ਪਈ ਸੀ। ਇਸ ਨਾਲ ਜਿਥੇ ਝੋਨਾ ਸੁੱਕਣਾ ਆਰੰਭ ਹੋ ਗਿਆ ਸੀ ਉੱਥੇ ਕਿਸਾਨਾਂ ਨੂੰ ਝੋਨੇ ਦੀਆਂ ਪਨੀਰੀਆਂ ਸੁੱਕਣ ਤੋਂ ਬਚਾਉਣ ਲਈ ਟੈਂਕਰਾਂ ਰਾਹੀਂ ਪਾਣੀ ਪਾਉਣਾ ਪੈ ਰਿਹਾ ਸੀ। ਪਿੰਡ ਨੰਡਿਆਲੀ ਦੇ ਕਿਸਾਨ ਗੁਰਮੀਤ ਸਿੰਘ, ਜਸਵੰਤ ਸਿੰਘ ਸਾਬਕਾ ਸਰਪੰਚ ਨੇ ਦੱਸਿਆ ਕਿ ਚੰਡੀਗੜ੍ਹ ਖੇਤਰ ਵਿੱਚ ਸਵੇਰ ਸਮੇਂ ਹੋਈ ਬਾਰਸ਼ ਦਾ ਪਾਣੀ ਦੁਪਹਿਰ ਵੇਲੇ ਇਥੇ ਪਹੁੰਚ ਗਿਆ ਸੀ। ਉਨ੍ਹਾਂ ਦੱਸਿਆ ਕਿ ਚੋਈ ਭਰ ਗਈ ਹੈ ਤੇ ਇਹ ਪਾਣੀ ਰਾਜਪੁਰਾ ਦੇ ਪਿੰਡਾਂ ਤੱਕ ਪਹੁੰਚ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਚੋਈ ਵਿੱਚ ਪਾਣੀ ਆਉਂਦਿਆਂ ਹੀ ਕਿਸਾਨਾਂ ਨੇ ਇੰਜਣਾਂ ਅਤੇ ਮੋਟਰਾਂ ਰਾਹੀਂ ਪਾਣੀ ਚੁੱਕਣਾ ਆਰੰਭ ਕਰ ਦਿੱਤਾ ਤੇ ਇਸ ਨਾਲ ਪਹਿਲਾਂ ਲਗਾਏ ਹੋਏ ਝੋਨੇ ਅਤੇ ਨਵੇਂ ਲਗਾਏ ਜਾਣ ਵਾਲੇ ਝੋਨੇ ਲਈ ਪਾਣੀ ਪੂਰਾ ਹੋ ਜਾਵੇਗਾ।
ਇਸ ਖ਼ਬਰ ਨੂੰ ਆਪਣੀ ਖੇਤੀ ਦੇ ਸਟਾਫ ਦੁਆਰਾ ਸੰਪਾਦਿਤ(ਸੋਧਿਆ) ਨਹੀਂ ਕੀਤਾ ਗਿਆ ਹੈ ਅਤੇ ਇਹ ਖ਼ਬਰ ਵੱਖ ਵੱਖ ਫੀਡ ਵੱਲੋਂ ਪ੍ਰਕਾਸ਼ਿਤ ਕੀਤੀ ਗਈ ਹੈ।
ਸ੍ਰੋਤ: ਪੰਜਾਬੀ ਟ੍ਰਿਬਿਊਨ
