ਮੁਲਕ ਚ ਸੱਭ ਤੋਂ ਵੱਡੇ ਮੰਡੀ ਸਿਸਟਮ ਵਾਲੇ ਪੰਜਾਬ ਸੂਬੇ ਚ ਮੌਸਮ ਦੀ ਗਰਮੀ ਵਧਣ ਨਾਲ ਕਣਕ ਦੀ ਕਟਾਈ ਅਤੇ 4 ਹਜ਼ਾਰ ਖਰੀਦ ਕੇਂਦਰਾਂ ਚ ਫ਼ਸਲ ਦੀ ਆਮਦ ਰੋਜ਼ਾਨਾ 6 ਲੱਖ ਟਨ ਤਕ ਹੋਣ ਕਰ ਕੇ ਖਰੀਦ ਚ ਤੇਜ਼ੀ ਆ ਗਈ ਹੈ। ਪਿਛਲੇ ਹਫ਼ਤੇ ਬੁਧਵਾਰ ਤੋਂ ਸ਼ੁਰੂ ਕੀਤੀ ਟੋਕਨ-ਪਾਸ ਸਿਸਟਮ ਵਾਲੀ, ਨਿਯਮਤ ਖਰੀਦ ਤਹਿਤ ਅੱਜ ਸ਼ਾਮ ਤਕ ਪੰਜਾਬ ਦੀਆਂ ਚਾਰ ਸਰਕਾਰੀ ਏਜੰਸੀਆਂ ਪਨਗ੍ਰੇਨ, ਮਾਰਕਫ਼ੈੱਡ, ਪਨਸਪ ਅਤੇ ਵੇਅਰਹਾਊਸਿੰਗ ਕਾਰਪੋਰੇਸ਼ਨ ਨੇ ਮੰਡੀਆਂ ਚ ਕੁਲ 28 ਲੱਖ ਟਨ ਤੋਂ ਵਧ ਆਮਦ ਚੋਂ 26,40,000 ਟਨ ਤਕ ਕਣਕ ਦੀ ਖਰੀਦ ਕਰ ਲਈ ਗਈ ਸੀ ਅਤੇ ਕਿਸਾਨਾਂ ਨੂੰ ਹੁਣ ਤਕ 626 ਕਰੋੜ ਦੀ ਅਦਾਇਗੀ ਕਰ ਦਿਤੀ ਸੀ।
ਅਨੰਦਿਤਾ ਮਿੱਤਰਾ ਨੇ ਦਸਿਆ ਕਿ ਮੰਤਰੀਆਂ ਸਮੇਤ ਸੀਨੀਅਰ ਅਧਿਕਾਰੀ ਜਿਨ੍ਹਾਂ ਚ ਰਵੀ ਭਗਤ, ਵਰੁਣ ਰੂਜ਼ਮ, ਰਾਮਬੀਰ, ਮਨਜੀਤ ਬਰਾੜ ਤੇ ਹੋਰ ਮੈਨੇਜਿੰਗ ਡਾਇਰੈਕਟਰ, ਵੱਡੀਆਂ ਤੇ ਛੋਟੀਆਂ ਮੰਡੀਆਂ ਚ ਕਿਸਾਨਾਂ ਤੇ ਹੋਰ ਸਟਾਫ਼ ਦੀਆਂ ਮੁਸ਼ਕਲਾਂ ਹੱਲ ਕਰਨ ਲਈ ਲਗਾਤਾਰ ਚੱਕਰ ਮਾਰ ਰਹੇ ਹਨ।
ਅਨਾਜ ਸਪਲਾਈ ਡਾਇਰੈਕਟਰ ਨੇ ਦਸਿਆ ਕਿ ਕੁਲ 135 ਲੱਖ ਟਨ ਕਣਕ ਖਰੀਦ ਦੇ ਟੀਚੇ ਚੋਂ ਸੱਭ ਤੋਂ ਵਧ 35 ਪ੍ਰਤੀਸ਼ਤ ਪਨਗ੍ਰੇਨ ਨੇ ਖਰੀਦਣਾ ਹੈ ਅਤੇ ਬਾਕੀ ਤਿੰਨ ਏਜੰਸੀਆਂ ਸਮੇਤ ਕੇਂਦਰੀ ਅਨਾਜ ਨਿਗਮ ਨੇ ਮੰਡੀਆਂ ਚੋਂ ਚੁਕਣਾ।
ਐਫ਼.ਸੀ.ਆਈ. ਨੂੰ 15 ਪ੍ਰਤੀਸ਼ਤ ਅਲਾਟ ਹੋਈ ਹੈ ਅਤੇ ਬਾਕੀ 50 ਫ਼ੀ ਸਦੀ ਯਾਨੀ ਅੱਧੀ ਚੋਂ ਪਨਸਪ, ਮਾਰਕਫ਼ੈੱਡ ਤੇ ਵੇਅਰ ਹਾਊਸਿੰਗ ਨੇ ਖਰੀਦਣਾ ਹੈ।
ਫਿਲਹਾਲ ਸਾਰੇ 22 ਜ਼ਿਲ੍ਹਿਆਂ ਚੋਂ ਸੰਗਰੂਰ ਜ਼ਿਲ੍ਹਾ ਕਣਕ ਖਰੀਦ ਚ ਅੱਗੇ ਹੈ। ਐਤਕੀਂ 12,27,000 ਟਨ ਦਾ ਟੀਚਾ ਹੈ, ਇਸ ਜ਼ਿਲ੍ਹੇ ਚੋਂ ਪਿਛਲੇ ਸਾਲ 11,89,000 ਟਨ ਕਣਕ ਦੀ ਖਰੀਦ ਹੋਈ ਸੀ। ਅਨੰਦਿਤਾ ਮਿੱਤਰਾ ਦਾ ਕਹਿਣਾ ਹੈ ਕਿ ਉਂਜ ਤਾਂ 15 ਜੂਨ ਤਕ ਖਰੀਦ ਕਰਨੀ ਹੈ, ਪਰ ਲਗਦਾ ਹੈ ਕੁਲ ਖਰੀਦ 31 ਮਈ ਤਕ ਪੂਰੀ ਕਰ ਲਈ ਜਾਵੇਗੀ।
ਇਸ ਖ਼ਬਰ ਨੂੰ ਆਪਣੀ ਖੇਤੀ ਦੇ ਸਟਾਫ ਦੁਆਰਾ ਸੰਪਾਦਿਤ(ਸੋਧਿਆ) ਨਹੀਂ ਕੀਤਾ ਗਿਆ ਹੈ ਅਤੇ ਇਹ ਖ਼ਬਰ ਵੱਖ ਵੱਖ ਫੀਡ ਵੱਲੋਂ ਪ੍ਰਕਾਸ਼ਿਤ ਕੀਤੀ ਗਈ ਹੈ।
ਸ੍ਰੋਤ: ਰੋਜ਼ਾਨਾ ਸਪੋਕਸਮੈਨ