Expert Advisory Details

ਕਿਸਾਨ ਵੀਰਾਂ ਨੂੰ ਸਲਾਹ ਦਿੱਤੀ ਜਾਂਦੀ ਹੈ ਕਿ ਕਿਸੀ ਵੀ ਫਸਲ ਨੂੰ ਪਾਣੀ ਨਾ ਲਾਓ ਅਤੇ ਸਪ੍ਰੇਅ ਨਾ ਕਰੋ

17-Jul-2018

ਕਿਸਾਨਾਂ ਲਈ ਮੌਸਮ ਅਤੇ ਫਸਲਾਂ ਦਾ ਹਾਲ: 

ਆਉਣ ਵਾਲੇ 2-3 ਦਿਨਾਂ ਦੌਰਾਨ ਹਲਕੀ ਤੋਂ ਦਰਮਿਆਨੀ ਬਾਰਿਸ਼ ਦੀ ਸੰਭਾਵਨਾ ਨੂੰ ਦੇਖਦੇ ਹੋਏ ਕਿਸਾਨ ਵੀਰਾਂ ਨੂੰ ਸਲਾਹ ਦਿੱਤੀ ਜਾਂਦੀ ਹੈ ਕਿ ਕਿਸੀ ਵੀ ਫਸਲ ਨੂੰ ਪਾਣੀ ਨਾ ਲਾਓ ਅਤੇ ਸਪ੍ਰੇਅ ਨਾ ਕਰੋ।

ਖੇਤੀ ਫਸਲਾਂ:

ਬਾਸਮਤੀ ਦੀਆਂ ਕਿਸਮਾਂ ਸੀ ਐਸ ਆਰ 30, ਬਾਸਮਤੀ 370, ਬਾਸਮਤੀ 386 ਅਤੇ ਪੂਸਾ ਬਾਸਮਤੀ 1509 ਦੀ ਪਨੀਰੀ ਦੀ ਖੇਤਾਂ ਵਿੱਚ ਲਵਾਈ ਸ਼ੁਰੂ ਕਰ ਲਵੋ ਪਰ ਪਨੀਰੀ ਨੂੰ ਖੇਤ ਵਿੱਚ ਲਗਾਉਣ ਤੋਂ ਪਹਿਲਾ ਪਨੀਰੀ ਨੂੰ 6 ਘੰਟੇ ਲਈ ਬਾਵਿਸਟਨ ਦੇ ਘੋਲ ਵਿੱਚ ਡੋਬਾ ਦਿਉ।

ਝੋਨੇ ਦੀ ਲੁਆਈ ਤੋਂ 15 ਦਿਨਾਂ ਪਿੱਛੋ ਪਾਣੀ ਉਸ ਸਮੇ ਲਾਉ ਜਦੋਂ ਪਹਿਲਾ ਪਾਣੀ ਜ਼ੀਰੇ ਨੂੰ 2 ਦਿਨ ਹੋ ਗਏ ਹੋਣ, ਪ੍ਰੰਤੂ ਖਿਆਲ ਰਹੇ ਕਿ ਖੇਤ ਵਿੱਚ ਤਰੇੜਾਂ ਨਾ ਪੈਣ।

ਨਰਮੇ ਦੇ ਖੇਤਾਂ ਵਿੱਚ ਪਾਣੀ ਖੜਾ ਨਾ ਹੋਣ ਦਿਉ।ਨਰਮੇ ਦੀ ਫ਼ਸਲ ਤੇ ਨਾਈਟਰੋਜਨ ਖਾਦ ਦੀ ਬਾਕੀ ਅੱਧੀ ਕਿਸ਼ਤ ਫੁੱਲ ਸ਼ੁਰੂ ਹੋਣ ਤੇ ਪਾ ਦਿਉ।ਨਰਮੇ ਦੀ ਫ਼ਸਲ ਤੇ 2% ਪੋਟਾਸ਼ੀਅਮ ਨਾਈਟ੍ਰੇਟ (13:0:45) ਦੇ 4 ਸਪਰੇਅ ਫੁੱਲ ਸ਼ੁਰੂ ਹੋਣ ਤੋਂ ਹਫ਼ਤੇ-ਹਫ਼ਤੇ ਦੀ ਵਿੱਥ ਤੇ ਕਰੋ ।

ਜੇਕਰ ਜ਼ਿਆਦਾ ਬਾਰਿਸ਼ ਦੇ ਕਾਰਨ ਨਰਮੇ ਦੀ ਫ਼ਸਲ ਤੇ ਪੈਰਾਵਿਲਟ ਦਾ ਹਮਲਾ ਨਜ਼ਰ ਆਵੇ ਤਾਂ 24 ਘੰਟੇ ਅੰਦਰ ਕੋਬਾਲਟ ਕਲੋਰਾਇਡ 1 ਗ੍ਰਾਮ ਪ੍ਰਤੀ 100 ਲਿਟਰ ਪਾਣੀ ਵਿੱਚ ਘੋਲ ਕੇ ਛਿੜਕਾਅ ਕਰੋ।

ਬਾਰਿਸ਼ ਦਾ ਪਾਣੀ ਮੱਕੀ ਦੇ ਖੇਤ ਵਿੱਚ ਨਾ ਖੜ੍ਹਾ ਹੋਣ ਦਿਓ ਕਿਉਂਕਿ ਇਹ ਫ਼ਸਲ ਜ਼ਿਆਦਾ ਪਾਣੀ ਨਹੀਂ ਸਹਾਰ ਸਕਦੀ। ਇਸ ਨਾਲ ਤਣਾ ਗਲਣ ਦੇ ਰੋਗ ਵਿੱਚ ਵਾਧਾ ਹੁੰਦਾ ਹੈ।

ਮੱਕੀ ਦੇ ਖੇਤ ਵਿੱਚ ਨਦੀਨਾਂ ਦੀ ਰੋਕਥਾਮ ਲਈ 20 ਦਿਨ ਦੀ ਫ਼ਸਲ ਤੇ 105 ਮਿਲੀ. ਲੌਡਿਸ ਪ੍ਰਤੀ ਏਕੜ ਦਾ ਛਿੜਕਾਅ ਕਰੋ।

ਸਬਜ਼ੀਆਂ ਅਤੇ ਫਲ:

ਸਬਜ਼ਿਆ ਅਤੇ ਫ਼ਲਾਂ ਤੇ ਬਾਗਾਂ ਵਿੱਚ ਬਾਰਿਸ਼ ਦਾ ਪਾਣੀ ਖੜਾ ਨਾ ਹੋਣ ਦਿਉ ।ਇਸ ਸਮੇਂ ਭਿੰਡੀ, ਘੀਆ, ਕੱਦੂ, ਕਾਲੀ ਤੋਰੀ ਅਤੇ ਕਾਉਪੀਜ-263 ਦੀ ਬਿਜਾਈ ਕਰੋ।ਗੋਭੀ, ਬੈਂਗਣ ਅਤੇ ਟਮਾਟਰ ਦੀਆਂ ਕਿਸਮਾਂ ਪੰਜਾਬ ਵਰਖਾ ਵਹਾਰ -4, ਪੰਜਾਬ ਵਰਖਾ ਵਹਾਰ -1 ਅਤੇ ਪੰਜਾਬ ਵਰਖਾ ਵਹਾਰ -2 ਦੀ ਪਨੀਰੀ ਲਾਉਣ ਲਈ ਢੁਕਵਾਂ ਸਮਾਂ ਹੈ।

ਚਲ ਰਿਹਾ ਮੌਸਮ ਮਿਰਚਾਂ ਤੇ ਫਲਾਂ ਦੇ ਗਾਲ੍ਹੇ ਲਈ ਢੁਕਵਾਂ ਹੈ ਇਸ ਕਰਕੇ ਮਿਰਚਾਂ ਦੀ ਫਸਲ ਤੇ ਇੰਡੋਮਿਲ ਐਮ-45 ਜਾਂ ਬਲਾਈਟੋਕਸ 750 ਗ੍ਰਾਮ ਪ੍ਰਤੀ ਏਕੜ ਦੇ ਹਿਸਾਬ ਨਾਲ 10 ਦਿਨਾਂ ਦੇ ਵਕਫੇ ਤੇ 3-4 ਛਿੜਕਾਅ ਮੌਸਮ ਸਾਫ ਹੋਣ ਤੇ ਕਰੋ।

ਇਹ ਸਮਾਂ ਸਦਾਬਹਾਰ ਫ਼ਲਦਾਰ ਬੂਟਿਆਂ ਜਿਵੇਂ ਕਿ ਨਿੰਬੂ ਜਾਤੀ, ਅੰਬ, ਲੀਚੀ, ਅਮਰੂਦ, ਲੁਕਾਠ, ਬੇਰ ਅਤੇ ਪਪੀਤੇ ਦੇ ਬਾਗਾਂ ਦੀ ਲਵਾਈ ਲਈ ਢੁੱਕਵਾਂ ਹੈ।ਅਮਰੂਦ ਦੇ ਬਾਗਾਂ ਵਿਚ ਪੀ. ਏ ਯੂ. ਫਰੂਟ ਫਲਾਈ ਟਰੈਪ (16 ਟਰੈਪ ਪ੍ਰਤੀ ਏਕੜ) ਲਗਾਓ ।

ਪਸ਼ੂ ਪਾਲਣ:

ਇਸ ਮਹੀਨੇ ਮੱਛਰ, ਮੱਖੀਆਂ ਅਤੇ ਚਿੱਚੜਾਂ ਦੀ ਤਦਾਦ ਵਧ ਜਾਂਦੀ ਹੈ ਜੋ ਪਸ਼ੂ ਦਾ ਖੂਨ ਚੂਸਦੇ ਹਨ ਅਤੇ ਬੀਮਾਰੀ ਫੈਲਾਉਂਦੇ ਹਨ।ਇਨ੍ਹਾਂ ਦੀ ਰੋਕਥਾਮ ਜਰੂਰ ਕਰੋ।

ਪਸ਼ੂਆਂ ਨੂੰ ਚਾਰਾ ਠੰਡੇ ਸਮੇਂ ਦੌਰਾਨ ਹੀ ਦਿਓ।