ਅੱਪਡੇਟ ਵੇਰਵਾ

ਇਸ ਤਰੀਕੇ ਨਾਲ ਆਪਣੇ ਬਜ਼ੁਰਗ ਕਰਦੇ ਸੀ ਦੁਧਾਰੂ ਪਸ਼ੂ ਦੀ ਪਹਿਚਾਣ

ਆਮ ਤੌਰ ਤੇ ਜਦੋ ਕਿਸਾਨ ਵੀਰ ਕੋਈ ਪਸ਼ੂ ਖਰੀਦਦੇ ਹਨ ਉਸ ਦੀ ਪਰਖ ਹੋਣੀ ਬਹੁਤ ਜਰੂਰੀ ਹੈ ਕਿ ਪਸ਼ੂ ਦੁੱਧ ਵਾਲ ਹੈ ਹਾਂ ਨਹੀ । ਕਈ ਵਪਾਰੀ ਚਲਾਕੀ ਨਾਲ ਭੋਲੇ ਭਾਲੇ ਕਿਸਾਨ ਵੀਰਾਂ ਨੂੰ ਉੱਲੂ ਬਣਾ ਕੇ ਆਪਣਾ ਪਸ਼ੂ ਵੇਚ ਦਿੰਦੇ ਹਨ ਪਰ ਜੇਕਰ ਕੁੱਝ ਸਧਾਰਨ ਗੱਲਾਂ ਦਾ ਧਿਆਨ ਰੱਖ ਲਿਆ ਜਾਵੇ ਤਾਂ ਇਸ ਹੋਣ ਵਾਲੇ ਧੋਖੇ ਤੋ ਬਚਿਆ ਜਾ ਸਕਦਾ ਹੈ। ਜੋ ਤਜ਼ਰਬੇਕਾਰ ਪਸ਼ੂ ਪਾਲਕ ਇਹ ਪੜਨਗੇ ਸ਼ਾਇਦ ਉਹਨਾਂ ਨੂੰ ਲਈ ਇਹ ਜਾਣਕਾਰੀ ਨਵੀ ਨਾਂ ਹੋਵੇ ਪਰ ਨਵੇ ਪਸ਼ੂ ਪਾਲਕਾਂ ਲਈ ਬਹੁਤ ਕੰਮ ਦੀ ਹੈ ।

1.ਪਸ਼ੂ ਦੇ ਚਾਰੇ ਥਣਾਂ ਵਿੱਚ ਜਿੰਨਾ ਜਿਆਦਾ ਗੈਬ ਹੋਵੇਗਾ ਉਹਨਾਂ ਹੀ ਪਸ਼ੂ ਦੁਧਾਰੂ ਜਿਆਦਾ ਹੋਵੇਗਾ ਇਸ ਲਈ ਥਣਾਂ ਵਿੱਚ ਗੈਬ ਇੱਕੋ ਜਿਹਾ ਤੇ ਜਿਆਦਾ ਹੋਣਾ ਚਾਹੀਦਾ ਹੈ । 

2. ਹਮੇਸ਼ਾ ਚੁਆਈ ਕਰਨ ਤੋਂ ਬਾਅਦ ਖਰੀਦੋ ਹੋ ਸਕੇ ਤਾਂ ਤਿੰਨ ਡੰਗ ਦੀ ਚੁਆਈ ਕਰੋ ਤਾਂ ਜੋ ਪਸ਼ੂ ਦੀ ਦੁੱਧ ਦੇਣ ਦੀ ਸਹੀ ਯੋਗਤਾ ਪਤਾ ਚੱਲ ਸਕੇ ਤੇ ਪਸ਼ੂ ਦੀ ਧਾਰ ਕੱਢਦੇ ਸਮੇਂ ਚਾਰੇ ਧਾਰਾਂ ਬਾਲਟੀ ਵਿੱਚ ਸਿੱਧੀਆਂ ਡਿੱਗਣੀਆਂ ਚਾਹੀਦੀਆਂ ਹਨ ਮਤਲਬ ਕਿ ਧਾਰਾਂ ਫੈਲਣੀਆਂ ਨਹੀ ਚਾਹੀਦੀਆ। 

3. ਜੇਕਰ ਪਸ਼ੂ ਦੀ ਪੂੰਛ ਨੂੰ ਉੱਪਰ ਨੂੰ ਮਰੋੜ ਕੇ ਦੇਖੋ ਤਾਂ ਜੇਕਰ ਅਸਾਨੀ ਨਾਲ ਮੁੜ ਜਾਵੇ ਭਾਵ ਕਿ ਜਿੰਨੀ ਲਚਕੀਲੀ ਪਸ਼ੂ ਦੀ ਪੂਛ ਹੋਵੇਗੀ ਉਨਾਂ ਹੀ ਪਸ਼ੂ ਦੁਧਾਰੂ ਹੋਵੇਗਾ। 

4. ਪਸ਼ੂ ਦੀ ਲੰਬਾਈ,ਚੌੜਾਈ ਤੇ ਉਚਾਈ ਵੀ ਜਿਆਦਾ ਹੋਵੇ ਕਿਉਕਿ ਜਿੰਨਾਂ ਹੀ ਲੰਬਾਈ ਚੌੜਾਈ ਜਿਅਦਾ ਹੋਵੇਗੀ ਉਨਾਂ ਹੀ ਖੂਨ ਦਾ ਸਰਕਲ ਜਿਆਦਾ ਹੋਵੇਗਾ ਤੇ ਪਸ਼ੂ ਦੁੱਧ ਜਿਆਦਾ ਦੇਣ ਵਾਲਾ ਹੋਵੇਗਾ । 

5.ਪਸ਼ੂ ਦੇ ਲੇਵੇ ਵੱਲ ਖਾਸ ਧਿਆਨ ਦੇਵੋ ਜਿਵੇਂ ਕਿ ਲੇਵਾ ਅੱਗੇ ਵੱਲ ਨੂੰ ਧੁੰਨੀ ਤੱਕ ਅਤੇ ਪਿੱਛੇ ਵੱਲ ਨੂੰ ਸੂਅ ਤੱਕ ਵਧਿਆ ਹੋਵੇ । ਇੱਕ ਪਾਸਿੳੇ ਦੇਖਣ ਤੇ ਇਹ ਚੰਦਰਮਾ ਦੀ ਤਰਾਂ ਗੁਲਾਈ ਵਿੱਚ ਹੋਣਾ ਚਾਹੀਦਾ ਹੈ।

6.ਲਵੇਰੀ ਦੇ ਮੋਢੇ ਛਾਤੀ ਨਾਲ ਇੱਕਸਾਰ ਜੁੜੇ ਹੋਣੇ ਚਾਹੀਦੇ ਹਨ । ਲੱਤਾਂ ਮਜਬੂਤ ਤੇ ਰੀੜ ਦੀ ਹੱਡੀ ਇੱਕਸਾਰ ਸਿੱਧੀ ਹੋਵੇ ਕਿਉਕੀ ਕੁੱਭ ਪਏ ਪਸ਼ੂਆਂ ਵਿੱਚ ਕੈਲਸ਼ੀਮ,ਫਾਸਫੋਰਸ ਜਾਂ ਮੈਗਨੀਸ਼ੀਅਮ ਦੀ ਘਾਟ ਹੋ ਸਕਦੀ ਹੈ ਇਸ ਤਰਾਂ ਦੇ ਪਸ਼ੂ ਨੂੰ ਖਰੀਦਣ ਤੋਂ ਗੁਰੇਜ਼ ਕਰੋ।

7.ਜੇਕਰ ਪਸ਼ੂ ਦੀ ਚੌੜਾਈ ਦੇਖਣੀ ਹੋਵੇ ਤਾਂ ਅੱਗੇ ਤੋਂ ਚੌੜਾਈ ਤੋਂ ਘੱਟ ਤੇ ਪਿੱਛੇ ਪਾਸੇ ਜਿਆਦਾ ਹੋਵੇ ਤਾਂ ਪਸ਼ੂ ਜਿਆਦਾ ਦੁੱਧ ਦੇਣ ਵਾਲਾ ਹੋਵੇਗਾ। ਪਸ਼ੂ ਨੂੰ ਤੋਰਨ ਸਮੇਂ ਉਸਦੇ ਪਿਛਲੇ ਖੁਰ ਅਗਲੇ ਖੁਰਾਂ ਦੇ ਨਿਸ਼ਾਨ ਤੇ ਆਉਣੇ ਚਾਹੀਦੇ ਹਨ।

8.ਪਸ਼ੂ ਦੇ ਗਰਦਨ ਤੇ ਹੇਠਲੇ ਜਬਾੜੇ ਤੇ ਪੂਰੇ ਧਿਆਨ ਨਾਲ ਦੇਖਣ ਤੇ ਜੇਕਰ ਗਲਹੀਰਾਂ ਦੇ ਨਿਸ਼ਾਨ ਦਿਸ ਪੈਣ ਤਾਂ ਅਜਿਹਾ ਪਸ਼ੂ ਨਾ ਖਰੀਦੋ।

ਇਸ ਤੋਂ ਇਲਾਵਾ ਹੋਰ ਗੱਲਾਂ ਜਿਵੇ ਕਿ ਪਸ਼ੂ ਦੀਆਂ ਅੱਖਾਂ ਚਮਕੀਲੀਆਂ, ਪਤਲ ਨਰਮ ਤੇ ਨੱਕ ਦਰਮਿਆਨਾ ਹੋਵੇ। ਇਹ ਗੱਲਾਂ ਤੁਹਾਨੂੰ ਧੋਖੇ ਤੋ ਬਚਾ ਸਕਦੀਆਂ ਹਨ।