ਅੱਪਡੇਟ ਵੇਰਵਾ

ਇੱਕ ਸੇਬ ਵਿੱਚ ਹੁੰਦੇ ਹਨ 10 ਕਰੋੜ ਬੈਕਟੀਰੀਆ

ਸਿਹਤ ਲਈ ਸੇਬ ਨੂੰ ਬਹੁਤ ਚੰਗਾ ਮੰਨਿਆ ਜਾਂਦਾ ਹੈ। ਕਿਹਾ ਵੀ ਜਾਂਦਾ ਹੈ ਕਿ ਰੋਜ਼ਾਨਾ ਇੱਕ ਸੇਬ ਖਾਣ ਨਾਲ ਡਾਕਟਰ ਕੋਲ ਜਾਣ ਦੀ ਲੋੜ ਨਹੀਂ ਪੈਂਦੀ। ਹੁਣ ਨਵੇਂ ਅਧਿਐਨ 'ਚ ਇਸ ਨਾਲ ਜੁੜੀਆਂ ਹੈਰਾਨ ਕਰਨ ਵਾਲੀਆਂ ਜਾਣਕਾਰੀਆਂ ਸਾਹਮਣੇ ਆਈਆਂ ਹਨ। ਖੋਜਾਰਥੀਆਂ ਦਾ ਦਾਅਵਾ ਹੈ ਕਿ ਫਾਈਬਰ ਤੇ ਵਿਟਾਮਿਨ ਤੋਂ ਇਲਾਵਾ ਇੱਕ ਸੇਬ 'ਚ 10 ਕਰੋੜ ਬੈਕਟੀਰੀਆ ਵੀ ਹੁੰਦੇ ਹਨ। ਇਹ ਬੈਕਟੀਰੀਆ ਸਿਹਤ ਲਈ ਚੰਗੇ ਹੁੰਦੇ ਹਨ ਜਾਂ ਬੁਰੇ, ਇਸ ਗੱਲ 'ਤੇ ਨਿਰਭਰ ਕਰਦਾ ਹੈ ਕਿ ਸੇਬ ਕਿਸ ਤਰ੍ਹਾਂ ਉਗਾਇਆ ਗਿਆ ਹੈ।

ਆਸਟ੍ਰੀਆ ਦੀ ਗਾਜ ਯੂਨੀਵਰਸਿਟੀ ਆਫ ਟੈਕਨਾਲੋਜੀ ਦੇ ਪ੍ਰੋਫੈਸ਼ਰ ਗ੍ਰੇਬ੍ਰੀਅਲ ਬਰਗ ਨੇ ਕਿਹਾ ਹੈ ਕਿ ਇਹ ਬੈਕਟੀਰੀਆ, ਕਵਕ ਤੇ ਵਾਇਰਸ ਜਿਹੜੇ ਅਸੀਂ ਖਾਂਦੇ ਹਾਂ, ਉਹ ਜਾ ਕੇ ਸਾਡੇ ਪੇਟ 'ਚ ਇਕੱਠੇ ਹੋ ਜਾਂਦੇ ਹਨ। ਪਕਾਉਣ ਕਾਰਨ ਇਨ੍ਹਾਂ 'ਚੋਂ ਵਧੇਰੇ ਮਰ ਜਾਂਦੇ ਹਨ। ਇਸ ਲਈ ਕੱਚੀਆਂ ਸਬਜ਼ੀਆਂ ਤੇ ਫਲ ਗਟ ਮਾਈਕ੍ਰੋਬਸ (ਆਂਤ ਦੇ ਰੋਗਾਣੂਆਂ) ਦਾ ਅਹਿਮ ਸਰੋਤ ਹਨ।