ਅੱਪਡੇਟ ਵੇਰਵਾ

ਜਾਣੋ ਪਸ਼ੂਆਂ ਵਿਚ ਨਿਮੋਨੀਆ ਰੋਗ ਦੇ ਲੱਛਣ ਅਤੇ ਇਲਾਜ

ਨਿਮੋਨੀਆ ਤੋਂ ਭਾਵ ਹੈ ਫੇਫੜਿਆਂ ਦੀ ਸੋਜ਼। ਇਸ ਬਿਮਾਰੀ ਦਾ ਹਮਲਾ ਅਕਸਰ 6 ਮਹੀਨੇ ਦੀ ਉਮਰ ਦੇ ਪਸ਼ੂਆਂ 'ਤੇ ਜ਼ਿਆਦਾ ਹੁੰਦਾ ਹੈ। ਵੱਡੀ ਉਮਰ ਦੇ ਪਸ਼ੂਆਂ ਵਿੱਚ ਇਹ ਹੱਥੂ ਆਉਣ ਕਰਕੇ ਜਾਂ ਗਲ-ਘੋਟੂ ਰੋਗ ਆਦਿ ਕਰਕੇ ਹੋ ਸਕਦੀ ਹੈ। ਇਸ ਬਿਮਾਰੀ ਦੇ ਸ਼ੁਰੂ ਹੋਣ ਦਾ ਮੁੱਖ ਕਾਰਨ ਪਸ਼ੂ ਦੀ ਬਿਮਾਰੀਆਂ ਨਾਲ ਲੜਨ ਦੀ ਸ਼ਕਤੀ ਘੱਟ ਜਾਣਾ ਹੈ।

ਨਿਮੋਨੀਆ ਦੇ ਮੁੱਖ ਕਾਰਨ

• ਅਤਿਅੰਤ ਗਰਮੀ ਜਾਂ ਸਰਦੀ
• ਖੁਰਾਕੀ ਤੱਤਾਂ ਦੀ ਘਾਟ (ਧਾਤਾਂ ਅਤੇ ਵਿਟਾਮਿਨ)
• ਪਸ਼ੂਆਂ ਨੂੰ ਗਿੱਲੇ ਅਤੇ ਹਨੇਰੇ ਕਮਰੇ 'ਚ ਬੰਨ੍ਹੀ ਰੱਖਣਾ
• ਲੰਬੇ ਸਫਰ 'ਚ ਖੁਰਾਕ ਅਤੇ ਪਾਣੀ ਨਾ ਦੇਣਾ

ਨਿਮੋਨੀਆ ਦੇ ਮੁੱਖ ਲੱਛਣ

• ਹਲਕੇ ਤੋਂ ਤੇਜ਼ ਬੁਖਾਰ ਅਤੇ ਪਸ਼ੂ ਸੁਸਤ ਰਹਿੰਦਾ ਹੈ।
• ਸਾਹ ਦੀ ਪ੍ਰਕਿਰਿਆ ਤੇਜ਼ ਅਤੇ ਨੱਕ ਵਿੱਚੋਂ ਰੇਸ਼ਾ ਡਿੱਗਦਾ ਹੈ।
• ਹਲਕੀ ਖੰਘ
• ਪਸ਼ੂ ਪੱਠੇ ਖਾਣੇ ਛੱਡ ਦਿੰਦਾ ਹੈ ਅਤੇ ਕਾਫੀ ਸੁਸਤ ਰਹਿੰਦਾ ਹੈ।
• ਜੇਕਰ ਬਿਮਾਰੀ ਗੰਭੀਰ ਰੂਪ ਧਾਰਨ ਕਰ ਜਾਵੇ ਤਾਂ ਪਸ਼ੂ ਮੂੰਹ ਖੋਲ ਕੇ ਸਾਹ ਲੈਂਦਾ ਹੈ।

ਨਿਮੋਨੀਆ ਦੇ ਇਲਾਜ ਅਤੇ ਸਾਵਧਾਨੀਆਂ

• ਰੋਗੀ ਪਸ਼ੂ ਨੂੰ ਅਲੱਗ ਅਤੇ ਆਰਾਮਦਾਇਕ ਜਗ੍ਹਾ 'ਤੇ ਰੱਖੋ।
• ਜ਼ਿਆਦਾ ਗਰਮੀ ਜਾਂ ਸਰਦੀ ਤੋਂ ਬਚਾਓ।
• ਪਸ਼ੂ ਦਾ ਇਲਾਜ ਛੇਤੀ ਤੋਂ ਛੇਤੀ ਸ਼ੁਰੂ ਕਰੋ
• ਕਟੜੂਆਂ ਜਾਂ ਵਛੜੂਆਂ ਦੀ ਖੁਰਾਕ ਵਿੱਚ ਵਿਟਾਮਿਨ ਅਤੇ ਧਾਤਾਂ ਪਾਓ।
• 7-10 ਦਿਨਾਂ ਤੱਕ ਐਂਟੀਬਾਇਓਟਿਕ ਹੀ ਇਲਾਜ ਲਈ ਸਾਰਥਕ ਹਨ।

ਨੋਟ - ਇਲਾਜ ਘੱਟੋ-ਘੱਟ 7-10 ਦਿਨਾਂ ਲਈ ਜਾਰੀ ਰੱਖੋ ਅਤੇ ਡਾਕਟਰ ਦੀ ਸਲਾਹ ਜ਼ਰੂਰ ਲਓ।