विशेषज्ञ सलाहकार विवरण

ਪਨੀਰੀ ਬੀਜਣ ਲਈ ਜਗ੍ਹਾ ਦੀ ਚੋਣ: ਪਨੀਰੀ ਵਾਲੀ ਜਗ੍ਹਾ ਬਿਲਕੁਲ ਪੱਧਰੀ ਰੱਖੋ ਅਤੇ ਕਿਸਮਾਂ ਦੇ ਰਲਾਅ ਤੋਂ ਬਚਾਅ ਲਈ ਉਸ ਜਗ੍ਹਾ ਦੀ ਚੋਣ ਕਰੋ ਜਿੱਥੇ ਪਿਛਲੇ ਸਾਲ ਝੋਨਾ ਝਾੜਿਆ ਨਾ ਗਿਆ ਹੋਵੇ।ਝੁਲਸ ਰੋਗ ਤੋਂ ਬਚਾਅ ਲਈ ਪਨੀਰੀ ਦਰੱਖਤਾਂ ਦੀ ਛਾਂ ਜਾਂ ਤੂੜੀ ਦੇ ਕੁੱਪਾਂ ਨੇੜੇ ਨਾ ਬੀਜੀ ਜਾਵੇ। ਪਨੀਰੀ ਵਾਲੀ ਜਗ੍ਹਾ ਕੰਕਰਾਂ, ਰੋੜਾਂ, ਨਦੀਨਾਂ ਤੋਂ ਮੁਕਤ ਅਤੇ ਪਾਣੀ ਦੇ ਸਰੋਤ ਦੇ ਨੇੜੇ ਹੋਵੇ।ਬਿਜਾਈ ਦਾ ਸਮਾਂ ਅਤੇ ਲੁਆਈ ਸਮੇਂ ਪਨੀਰੀ ਦੀ ਉਮਰ: ਲੁਆਈ ਸਮੇਂ ਪਨੀਰੀ ਦੀ ਉਮਰ, ਕਿਸਮ ਦੁਆਰਾ ਪੱਕਣ ਲਈ ਲੈਣ ਵਾਲੇ ਕੁੱਲ ਸਮੇਂ ਤੇ ਨਿਰਭਰ ਕਰਦੀ ਹੈ। ਇਸ ਲਈ ਕਿਸਮਾਂ ਦੀ ਬਿਜਾਈ ਅਤੇ ਲੁਆਈ ਸਮੇਂ ਪਨੀਰੀ ਦੀ ਉਮਰ ਵੱਲ ਖਾਸ ਧਿਆਨ ਰੱਖੋ।

ਬੀਜ ਦੀ ਮਾਤਰਾ ਅਤੇ ਬਿਜਾਈ ਦਾ ਤਰੀਕਾ: ਇੱਕ ਏਕੜ ਝੋਨਾ ਲਾਉਣ ਲਈ ਪਨੀਰੀ ਤਿਆਰ ਕਰਨ ਵਾਸਤੇ 8 ਕਿੱਲੋ ਬੀਜ ਦੀ ਵਰਤੋਂ ਕਰੋ। ਫੋਕੇ ਅਤੇ ਹਲਕੇ ਬੀਜ ਕੱਢਣ ਲਈ ਬੀਜ ਨੂੰ ਪਾਣੀ ਨਾਲ ਭਰੇ ਟੱਬ ਜਾਂ ਬਾਲਟੀ ਵਿੱਚ ਡੁਬੋ ਕੇ ਸੋਟੀ ਨਾਲ ਹਲਾਉਣ ਉਪਰੰਤ ਪਾਣੀ ਉੱਪਰ ਤੈਰ ਦੇ ਬੀਜ ਕੱਢ ਦਿਓ ਅਤੇ ਨਰੋਏ ਬੀਜ ਪਨੀਰੀ ਦੀ ਬਿਜਾਈ ਲਈ ਰੱਖ ਲਵੋ। ਬੀਜ ਨੂੰ ਗਿੱਲਾ ਰੱਖਣ ਲਈ ਉੱਪਰੋਂ ਪਾਣੀ ਦਾ ਛਿੜਕਾਅ ਕਰ ਦਿਓ। ਇਸ ਤਰ੍ਹਾਂ 24-36 ਘੰਟੇ ਵਿੱਚ ਬੀਜ ਪੁੰਗਰ ਆਵੇਗਾ।ਇਸ ਪੁੰਗਰੇ ਬੀਜ ਨੂੰ ਤਕਰੀਬਨ 6.5 ਮਰਲੇ (160 ਵਰਗਮੀਟਰ) ਥਾਂ ਉੱਪਰ ਛੱਟਾ ਮਾਰ ਕੇ ਖਿਲਾਰ ਦਿਓ। ਪੰਛੀਆਂ ਤੋਂ ਬਚਾਅ ਲਈ ਬੀਜ ਨੂੰ ਰੂੜੀ ਦੀ ਹਲਕੀ ਤਹਿ ਨਾਲ ਢੱਕ ਦਿਓ।ਖੇਤ ਨੂੰ ਪਾਣੀ ਲਗਾ ਕੇ ਗਿੱਲਾ ਰੱਖੋ ਪ੍ਰੰਤੂ ਇਸ ਗੱਲ ਦਾ ਧਿਆਨ ਰਹੇ ਕਿ ਬੀਜਾਂ ਦੇ ਪੁੰਗਰਨ ਤੱਕ ਪਾਣੀ ਖੇਤ ਵਿੱਚ ਖੜ੍ਹਾ ਨਾ ਹੋਵੇ।